खेडमध्ये बांधकाम साइटवरून पडून परप्रांतीय कामगाराचा मृत्यू

खेड : भरणे नाका परिसरातील बांधकाम सुरू असलेल्या साईटवर पाचव्या मजल्यावरून तोल जाऊन खाली पडल्याने २९ वर्षीय कामगाराचा उपचारादरम्यान मृत्यू झाला. ही घटना १५ सप्टेंबर रोजी दुपारी घडली.

हृधर अली हदीस मन्सुरी (वय २९, रा. संतपूर, ठाणे मांजगढ, तहसील मन्सुरी, जि. गोपालगंज, बिहार) असे मृत कामगाराचे नाव आहे. तो खेड भरणे नाका येथील सनसिटी कन्स्ट्रक्शनच्या साईटवर काम करीत होता.

पोलिसांनी दिलेल्या माहितीनुसार, १५ सप्टेंबर रोजी दुपारी सुमारे १२.४५ वाजण्याच्या सुमारास काम करीत असताना पाचव्या मजल्यावरून त्याचा अचानक तोल गेला. यावेळी तो फळीसह खालील पॉडियम पार्किंगच्या स्लॅबवर पडला. या दुर्घटनेत त्याच्या डोक्याला, डाव्या हाताला तसेच छातीला गंभीर दुखापत झाली.

जखमी अवस्थेत त्याला खेड येथील मधुसिद्धी हॉस्पिटल, डॉ. उपेंद्र तलाठी हॉस्पिटलमध्ये उपचारासाठी दाखल करण्यात आले. मात्र, उपचार सुरू असतानाच डॉक्टरांनी त्याला दुपारी १२.४५ वाजता मृत घोषित केले.

या घटनेची माहिती मृताचा चुलत भाऊ रेहतमुल्ला आलम हाफिजमिया मन्सुरी यांनी पोलिसांना दिली. या प्रकरणी खेड पोलीस ठाण्यात एएमआर क्रमांक ७६/२०२६ अन्वये भारतीय नागरिक सुरक्षा संहिता (BNSS) कलम १९४ नुसार नोंद करण्यात आली असून, पुढील तपास सुरू आहे.