खेड : सामाजिक बांधिलकी जपत नागरिकांच्या आरोग्याची काळजी घेण्याच्या उद्देशाने खेड तालुका कुणबी कर्मचारी संघ आणि इन्फिगो आय केअर हॉस्पिटल यांच्या संयुक्त विद्यमाने भव्य मोफत नेत्र तपासणी शिबिराचे आयोजन करण्यात आले. इन्फिगो आय केअर हॉस्पिटलमध्ये पार पडलेल्या या शिबिराचे उद्घाटन मान्यवरांच्या हस्ते उत्साहात झाले. या शिबिरात परिसरातील अनेक नागरिकांनी सहभाग नोंदवत डोळ्यांची तपासणी करून घेतली. तज्ज्ञ डॉक्टरांकडून रुग्णांना डोळ्यांच्या विविध आजारांवर उपयुक्त मार्गदर्शन करण्यात आले, तसेच आवश्यक रुग्णांसाठी मोतीबिंदू शस्त्रक्रिया आणि चष्म्यांवर विशेष सवलत देण्यात आली.
या उद्घाटनप्रसंगी कुणबी कर्मचारी संघाचे सल्लागार विलास धामणे, अध्यक्ष राजेंद्र चांदिवडे, सचिव श्रीकृष्ण खांडेकर, कार्याध्यक्ष शैलेश पराडकर, महिला प्रतिनिधी ऋतुजा चांदिवडे, ओबीसी व्हीजेएनटी कर्मचारी संघाचे अध्यक्ष सचिन गोवळकर, कोषाध्यक्ष संदीप घाणेकर आणि उपाध्यक्ष संजय जाधव यांच्यासह पदाधिकारी उपस्थित होते. तसेच इन्फिगो आय केअर हॉस्पिटलच्या सामान्य व बाह्य रुग्णसेवा विभागाच्या डॉ. रिबेका इरोम आणि प्रतिनिधी ऋतिक तावडे यांनी उपस्थित राहून रुग्णांना मार्गदर्शन केले. सर्वसामान्य जनतेसाठी अशा आरोग्यविषयक उपक्रमांची मोठी गरज असून शिबिराला मिळालेल्या प्रतिसादाबद्दल उपस्थितांनी समाधान व्यक्त केले.
