दाभोळे/ सिकंदर फरास : दाभोळे येथील ग्राम महसूल कार्यालयाचा कारभार आणि महसूल सेवक दिलीप मालप यांच्या कामकाजाविरोधात बाजारपेठ, दाभोळे येथील रहिवासी सचिन शामगोंडा पाटील यांनी १८ सप्टेंबरपासून तलाठी कार्यालयासमोर बेमुदत उपोषण सुरू केले होते. ‘दाभोळे तलाठी कार्यालय आहे तरी कुठे? महसूल खाते काय करतंय?’ असा संतप्त सवाल फलकाद्वारे उपस्थित करत पाटील यांनी प्रशासकीय अनास्थेकडे लक्ष वेधले होते.
महसूल विभागाशी संबंधित सामान्य नागरिकांची कामे वेळेत होत नसल्याचा तसेच दाभोळे तलाठी कार्यालयाच्या कारभारामुळे नागरिकांना अडचणींचा सामना करावा लागत असल्याचा आरोप आंदोलनादरम्यान करण्यात आला. या प्रकरणाची प्रशासनाने दखल घेत संगमेश्वर नायब तहसीलदारांनी १९ सप्टेंबर रोजी आंदोलनकर्त्यांना लेखी पत्र दिले. दाभोळे महसूल सेवक दिलीप मालप यांच्याविरोधातील लेखी अथवा व्हिडिओ स्वरूपातील तक्रारी २१ सप्टेंबर २०२६ रोजी प्रत्यक्ष तहसीलदारांसमोर सादर करण्याचे निर्देश या पत्रातून देण्यात आले आहेत.
दाभोळे तलाठी कार्यालयाशी संबंधित प्राप्त तक्रारींची सखोल चौकशी करून योग्य ती कायदेशीर कारवाई करण्यात येईल, असे प्रशासनाने लेखी आश्वासन दिले. तसेच सुरू असलेले बेमुदत उपोषण तातडीने स्थगित करण्याचे आवाहन नायब तहसीलदारांनी केले. प्रशासनाच्या लेखी आश्वासनानंतर सचिन पाटील यांनी उपोषण स्थगित केले.
यावेळी पोलिस प्रशासन, आरोग्य विभाग, महसूल विभागाचे अधिकारी तसेच दाभोळे गावातील गावकर गणपत बेलकर उपस्थित होते. आता २१ सप्टेंबर रोजी तक्रारी सादर झाल्यानंतर प्रशासनाकडून या प्रकरणाची चौकशी कशा पद्धतीने केली जाते आणि चौकशीनंतर नेमकी कोणती कारवाई होते, याकडे दाभोळे परिसरातील नागरिकांचे लक्ष लागले आहे.
