कुडपसह चिपळूण तालुक्याच्या शिरपेचात मानाचा तुरा; जनकल्याण सामाजिक सेवा संस्थेतर्फे कोल्हापुरात गौरव
सावर्डे (विनायक सावंत) : सामाजिक, आध्यात्मिक आणि प्रबोधनाच्या क्षेत्रात उल्लेखनीय योगदान देणारे कुडप (ता. चिपळूण) येथील सुपुत्र तथा वारकरी साहित्य परिषदेचे चिपळूण तालुकाध्यक्ष ह.भ.प. राजेंद्र महाराज राजेशिर्के यांना प्रतिष्ठेच्या “राज्यस्तरीय वारकरी रत्न” पुरस्काराने नुकतेच सन्मानित करण्यात आले. कोल्हापूर येथील जनकल्याण सामाजिक सेवा संस्थेच्या वतीने आयोजित भव्य राज्यस्तरीय पुरस्कार वितरण सोहळ्यात मान्यवरांच्या हस्ते हा गौरव संपन्न झाला.
महाराष्ट्र शासन मान्यताप्राप्त तसेच पर्यावरण संवर्धन, व्यसनमुक्ती, महिला सक्षमीकरण, कृषी विकास आणि वंचित घटकांच्या उत्थानासाठी कार्यरत असलेल्या जनकल्याण सामाजिक सेवा संस्थेतर्फे दरवर्षी विविध क्षेत्रांतील गुणवंतांना सन्मानित केले जाते. याच उपक्रमांतर्गत यंदाच्या पुरस्कारासाठी ह.भ.प. राजेंद्र महाराज यांची निवड करण्यात आली होती. कोल्हापूर येथे संपन्न झालेल्या या सोहळ्यात मान्यवरांच्या हस्ते स्मृतिचिन्ह, सन्मानपत्र आणि पुष्पगुच्छ देऊन त्यांना गौरविण्यात आले.
राजेशिर्के महाराज यांनी वारकरी संप्रदायाचा समृद्ध वारसा, संत साहित्याचे विचार आणि मूल्ये समाजाच्या तळागाळापर्यंत पोहोचवण्यासाठी सातत्याने भरीव कार्य केले आहे. कीर्तन, प्रवचन आणि समाजप्रबोधनाच्या माध्यमातून त्यांनी समाजात एकात्मता व सकारात्मक विचार रुजवले आहेत. त्यांच्या याच निस्वार्थ आध्यात्मिक आणि सामाजिक योगदानाची दखल घेऊन त्यांना हा पुरस्कार बहाल करण्यात आला आहे. या सन्मानामुळे कुडप, सावर्डे परिसरासह संपूर्ण चिपळूण तालुक्यात आनंद व्यक्त होत असून सर्वच स्तरांतून त्यांच्यावर अभिनंदनाचा वर्षाव होत आहे.
