देवरूख: देवरूख शिक्षण प्रसारक मंडळाच्या आठल्ये-सप्रे-पित्रे स्वायत्त महाविद्यालयातील तृतीय वर्ष वाणिज्य शाखेची विद्यार्थिनी कु. अनुष्का संदीप पर्शराम हिची नवी दिल्ली येथे आयोजित ‘कॅम्पस से संसद’ या विशेष अभ्यास उपक्रमासाठी निवड झाली आहे. राज्यसभेचे खासदार आणि भाजपचे राष्ट्रीय सचिव विनोद तावडे यांच्या संकल्पनेतून साकारलेल्या या उपक्रमांतर्गत अनुष्काला देशाच्या नव्या संसद भवनास प्रत्यक्ष भेट देण्याची संधी मिळणार आहे. संपूर्ण महाराष्ट्रातून निवडल्या गेलेल्या अवघ्या ३१ विद्यार्थ्यांमध्ये अनुष्काचा समावेश असून, तिने या राष्ट्रीय उपक्रमात रत्नागिरी जिल्ह्याचा झेंडा फडकावला आहे.
या उपक्रमासाठी राज्यभरातील विविध महाविद्यालयांमधून लेखी परीक्षा आणि मुलाखत अशा दोन अत्यंत चुरशीच्या टप्प्यांतून निवड प्रक्रिया पार पडली. देवरूख महाविद्यालयातील ५० विद्यार्थ्यांनी या प्रक्रियेत सहभाग घेतला होता. महाविद्यालयाच्या आबासाहेब व कमलाबाई सरदेशपांडे ग्रंथालयात घेण्यात आलेल्या लेखी प्रश्नमंजुषा फेरीत अव्वल ठरलेल्या ५ विद्यार्थ्यांची अंतिम मुलाखतीसाठी निवड झाली. त्यानंतर मुंबईहून आयोजकांनी घेतलेल्या ऑनलाइन मुलाखतीमध्ये अनुष्का पर्शराम हिने चमकदार कामगिरी करत दिल्ली दौऱ्याचे तिकीट पक्के केले.
आठवडाभर चालणाऱ्या या विशेष अभ्यास दौऱ्यात विद्यार्थ्यांना नव्या संसद भवनासोबतच राष्ट्रपती भवन, राष्ट्रीय युद्ध स्मारक यांसारख्या ऐतिहासिक व राष्ट्रीय महत्त्वाच्या स्थळांना भेट देण्याची आणि विविध महत्त्वाच्या आस्थापनांमधील तज्ज्ञांशी संवाद साधण्याची मौल्यवान संधी मिळणार आहे. निवड प्रक्रियेदरम्यान विद्यार्थ्यांना महाविद्यालयातील प्रा. स्नेहलता पुजारी, प्रा. संदीप मुळ्ये आणि प्रा. शिवराज कांबळे यांचे मोलाचे मार्गदर्शन लाभले.
अनुष्काच्या या उल्लेखनीय यशाबद्दल देवरूख शिक्षण प्रसारक मंडळाचे अध्यक्ष सदानंद भागवत, पदाधिकारी नेहा जोशी, कृष्णकुमार भोसले, शिरीष फाटक, महाविद्यालयाचे प्राचार्य डॉ. नरेंद्र तेंडोलकर यांच्यासह शिक्षक व शिक्षकेतर कर्मचाऱ्यांनी तिचे मनापासून अभिनंदन केले असून तिच्या पुढील दिल्ली अभ्यास दौऱ्यासाठी शुभेच्छा दिल्या आहेत.
