रत्नागिरी : रेल्वेतून होणाऱ्या बेकायदेशीर दारू वाहतुकीला आळा घालण्यासाठी रेल्वे सुरक्षा दलाने (आरपीएफ) हाती घेतलेल्या ‘ऑपरेशन सतर्क’ मोहिमेअंतर्गत रत्नागिरी रेल्वेस्थानकावर मोठी कारवाई करण्यात आली. ट्रेन क्रमांक १२४४९ गोवा संपर्क क्रांती एक्सप्रेसमधून गोवा बनावटीच्या दारूच्या १०० छोट्या बाटल्या जप्त करण्यात आरपीएफच्या पथकाला यश आले असून, या कारवाईमुळे रेल्वे मार्गावरून चालणाऱ्या अवैध मद्य तस्करीचा पर्दाफाश झाला आहे.
बुधवार, ३० सप्टेंबर रोजी रत्नागिरी रेल्वेस्थानकावर दाखल झालेल्या गोवा संपर्क क्रांती एक्सप्रेसमध्ये आरपीएफ पथकाकडून नियमित तपासणी मोहीम सुरू होती.
या दरम्यान इंजिनच्या बाजूला असलेल्या दुसऱ्या जनरल डब्यात पोलिसांना एक संशयास्पद बेवारस बॅग आढळून आली. डब्यातील प्रवाशांकडे चौकशी केली असता त्या बॅगेवर कोणीही आपला दावा सांगितला नाही. त्यामुळे आरपीएफच्या पथकाने तत्काळ ती बॅग ताब्यात घेऊन पुढील तपास व कारवाईसाठी रत्नागिरी येथील आरपीएफ पोस्टवर आणली. तेथे पंचांसमक्ष बॅग उघडून तपासणी केली असता, त्यामध्ये अवैधरीत्या वाहतूक केल्या जाणाऱ्या गोवा बनावटीच्या दारूच्या १०० छोट्या बाटल्या मिळून आल्या. आरपीएफने संपूर्ण मुद्देमाल जप्त केला असून याप्रकरणी पुढील कायदेशीर कारवाई सुरू आहे.
