नागरिकांच्या अडचणी सोडविण्यासाठी प्रशासन २४ तास सज्ज; ‘सेवा संकल्प अभियाना’तून थेट जनतेपर्यंत शासकीय सेवा

लोकसंवाद २०२६मध्ये जिल्हाधिकारी मनुज जिंदल यांची माहिती; प्रत्येक गावात एक हजार वृक्ष लागवडीचा संकल्प

रत्नागिरी : स्वच्छता, आरोग्य, वृक्षारोपणासह विविध शासकीय सेवा आणि दाखले थेट नागरिकांपर्यंत पोहोचविण्याच्या उद्देशाने रत्नागिरी जिल्ह्यात ‘सेवा संकल्प अभियान’ राबविण्यात येत आहे. नागरिकांच्या अडचणी आणि प्रशासकीय प्रश्नांचे शक्य तितके जागेवरच निराकरण करण्यावर या अभियानाचा भर असून, नागरिकांच्या कोणत्याही अडचणी सोडविण्यासाठी संपूर्ण प्रशासन २४ तास उपलब्ध आहे, अशी ग्वाही जिल्हाधिकारी मनुज जिंदल यांनी दिली.

माहिती व जनसंपर्क महासंचालनालयाच्या अंतर्गत जिल्हा माहिती कार्यालयाच्या वतीने कुवारबाव उत्कर्ष नगर येथील वडार समाज सेवा गणेशोत्सव मंडळात ‘लोकसंवाद २०२६’ कार्यक्रमाचे आयोजन करण्यात आले होते. या कार्यक्रमात जिल्हाधिकारी जिंदल यांनी ‘सेवा संकल्प अभियाना’ची सविस्तर माहिती दिली. यावेळी मुख्य कार्यकारी अधिकारी वैदेही रानडे उपस्थित होत्या.

१७ ऑक्टोबरपर्यंत अभियान; विविध शासकीय सेवा एकाच ठिकाणी

पंतप्रधान नरेंद्र मोदी यांच्या संवैधानिक पदावरील २५ वर्षांच्या लोकसेवेच्या निमित्ताने ‘सेवा संकल्प अभियान’ राबविण्यात येत आहे. १७ सप्टेंबरपासून १७ ऑक्टोबरपर्यंत चालणाऱ्या या अभियानाच्या माध्यमातून विविध विभागांच्या सेवा नागरिकांपर्यंत पोहोचविण्याबरोबरच त्यांच्या प्रशासकीय अडचणी सोडविण्याचा प्रयत्न केला जाणार आहे.

नागरिकांना आवश्यक असलेले विविध शासकीय दाखले, कागदपत्रांशी संबंधित अडचणी तसेच विविध प्रशासकीय कामांचे निराकरण करण्यासाठी विशेष उपक्रम राबविण्यात येणार आहेत. विविध सेवा आणि तक्रारींचे निवारण एकाच छताखाली करण्याचा प्रशासनाचा प्रयत्न असल्याचे जिल्हाधिकाऱ्यांनी सांगितले.

प्रत्येक गावात एक हजार वृक्ष लागवडीचा संकल्प

पर्यावरण संवर्धनालाही या अभियानात विशेष महत्त्व देण्यात आले आहे. आगामी काळात टप्प्याटप्प्याने जिल्ह्यातील प्रत्येक गावात एक हजार वृक्षांची लागवड करण्याचा संकल्प करण्यात आला आहे. या उपक्रमात नागरिकांनीही सक्रिय सहभाग घेऊन पर्यावरण संवर्धनाच्या या मोहिमेला बळ द्यावे, असे आवाहन जिल्हाधिकारी जिंदल यांनी केले.

या अभियानात आरोग्य कर्मचारी, शिक्षक, ग्रामपंचायत कर्मचारी तसेच महसूल विभागातील अधिकारी-कर्मचारी स्वतःहून पुढाकार घेत असल्याबद्दल जिल्हाधिकाऱ्यांनी समाधान व्यक्त केले. ‘सेवा संकल्प अभियान’ केवळ विविध उपक्रमांपुरते मर्यादित न राहता लोकांचे प्रत्यक्ष प्रश्न सोडविणारे अभियान ठरावे, यासाठी प्रशासन प्रयत्नशील असल्याचे त्यांनी स्पष्ट केले.

दरम्यान, कुवारबाव येथील वडार समाज सेवा गणेशोत्सव मंडळाने गणेशोत्सवाला सामाजिक सेवेची जोड दिल्याबद्दल जिल्हाधिकारी जिंदल यांनी मंडळाचे विशेष कौतुक केले.

यावेळी जिल्हा आरोग्य अधिकारी डॉ. अनिरुद्ध आठल्ये, जिल्हा शल्यचिकित्सक डॉ. भास्कर जगताप, शासकीय वैद्यकीय महाविद्यालयाचे अधिष्ठाता डॉ. जयप्रकाश रामानंद, उपमुख्य कार्यकारी अधिकारी सागर पाटील, गटविकास अधिकारी उमेश गावधडकर, मंडळाचे अध्यक्ष सुनील वडार, उपाध्यक्ष विलास माने, खजिनदार सागर वाघ यांच्यासह नागरिक उपस्थित होते.