गणपतीपुळे (वैभव पवार) : भारतीय बौद्ध महासभा ग्रामशाखा निवेंडी-समतानगर यांच्या वतीने वर्षावास प्रवचन मालिकेतील १४ वे पुष्प येथील महाबोधी विहारामध्ये मोठ्या उत्साहात आणि भक्तीभावात गुंफण्यात आले. ग्रामशाखेचे अध्यक्ष दिवाकर कदम यांच्या अध्यक्षतेखाली हा कार्यक्रम संपन्न झाला. कार्यक्रमाच्या प्रारंभी ग्रामशाखेचे सचिव मीनानाथ कदम यांनी उपस्थितांचे स्वागत करून प्रास्ताविक केले. त्यानंतर प्रमुख प्रवचनकार तथा लांजा तालुका संस्कार विभागाचे उपाध्यक्ष, माजी श्रामणेर बौद्धाचार्य आदेश जाधव, अध्यक्ष दिवाकर कदम आणि मान्यवरांच्या हस्ते महाबोधी विहारातील तथागत बुद्ध व डॉ. बाबासाहेब आंबेडकर यांच्या प्रतिमांना पुष्पहार अर्पण करून दीपप्रज्वलन करण्यात आले, तसेच उपस्थितांनी त्रिसरण व पंचशीलाचे सामूहिक ग्रहण केले. याप्रसंगी उपस्थित मान्यवर, तालुका पदाधिकारी, माजी श्रामणेर व बौद्धाचार्य यांचा ग्रामशाखा व तालुका शाखेतर्फे गुलाबपुष्प देऊन यथोचित सत्कार करण्यात आला. या सोहळ्यास मुंबई कमिटीचे अध्यक्ष नागेश कदम, निवेंडीच्या सरपंच रविना कदम आणि सावित्रीबाई फुले महिला मंडळाच्या अध्यक्षा स्वाती कदम यांची प्रमुख उपस्थिती होती.
याप्रसंगी जिल्हा पाली विभागाचे उपाध्यक्ष व तालुका संघटक दिलीप वासनिक यांनी वर्षावासाचे महत्त्व विशद करताना प्राचीन बौद्ध संस्कृती, सम्राट अशोकांचे शिलालेख व लेणींचा इतिहास समजून घेण्यासाठी धम्मलिपी व पाली भाषा शिकण्याचे आवाहन केले. त्यानंतर ‘डॉ. बाबासाहेब आंबेडकर बोधिसत्व कसे?’ या विषयावर मुख्य प्रवचन सादर करताना बौद्धाचार्य आदेश जाधव यांनी बाबासाहेबांच्या संघर्षमय जीवनप्रवासावर सविस्तर प्रकाश टाकला. लहानपणापासून अत्यंत हलाखीच्या परिस्थितीतून शिक्षण घेत असताना रामजी बाबा व त्यांच्या आत्यांनी दिलेले योगदान, वर्गाबाहेर बसून ज्ञानसाधना करत देशाचे संविधानकर्ते होण्यापर्यंतचा त्यांचा प्रवास थक्क करणारा असल्याचे त्यांनी नमूद केले. तथागतांनी सांगितलेल्या शील, दान, उपेक्षा, त्याग, वीर्य, शांती, सत्य, अधिष्ठान आणि करुणा या दसपारमितांचे पालन बाबासाहेबांनी आयुष्यभर केले; त्यांचा स्वार्थत्याग, दिनदुबळ्यांसाठीचा अहिंसक लढा आणि संविधानातून दिलेली स्वातंत्र्य, समता, बंधुतेची देणगी यामुळेच ते खऱ्या अर्थाने ‘बोधिसत्व’ आहेत, असे प्रतिपादन त्यांनी केले. अभ्यासपूर्ण विवेचनासोबतच त्यांनी सादर केलेल्या प्रबोधनात्मक गीताने उपस्थित जनसमुदाय भावूक झाला होता.
कार्यक्रमाच्या उत्तरार्धात अध्यक्ष दिवाकर कदम यांनी मनोगत व्यक्त करत सर्वांचे आभार मानले, तर तालुका संस्कार विभाग सचिव स्वप्नील पवार यांनी नेटके आयोजनाबद्दल ग्रामशाखेचे कौतुक केले. सरणत्तय गाथेने कार्यक्रमाची सांगता झाली. या संपूर्ण कार्यक्रमाचे सुरेख सूत्रसंचालन यश चंद्रकांत कदम व स्वप्नील पवार यांनी केले. विशेष म्हणजे, ग्रामशाखेने नुकत्याच उभारलेल्या या विहाराच्या विकासानंतर आयोजित वर्षावास कार्यक्रमाच्या संपूर्ण खर्चाची जबाबदारी स्थानिक माता सावित्रीबाई फुले महिला मंडळाने उचलल्याबद्दल त्यांचे विशेष कौतुक करण्यात आले. या सोहळ्यास तालुका अध्यक्ष सुनील पवार, संस्कार विभाग उपाध्यक्ष प्रितम सावंत, नंदकुमार यादव, प्रमोद जाधव, अशोक यादव, सुधीर जाधव, दिलीप जाधव यांसह तालुक्यातील बहुसंख्य उपासक-उपासिका व धम्मबांधव मोठ्या संख्येने उपस्थित होते. कार्यक्रमाच्या शेवटी ग्रामशाखेच्या वतीने सर्वांसाठी स्नेहभोजन व भोजनदानाची व्यवस्था करण्यात आली होती.
