राजापूर : तालुक्यातील शेजवली वरचीवाडी येथे एका ३४ वर्षीय तरुणाने आपल्या राहत्या घरी गळफास लावून आत्महत्या केल्याची धक्कादायक घटना घडली आहे. जयेश महादेव राणे (वय ३४, रा. शेजवली, वरचीवाडी, ता. राजापूर, जि. रत्नागिरी) असे मयत तरुणाचे नाव आहे. याप्रकरणी राजापूर पोलीस ठाण्यात भारतीय नागरिक सुरक्षा संहिता (बीएनएसएस) कलम १९४ अन्वये अकस्मात मृत्यू रजिस्टर क्रमांक ६३/२०२६ नुसार नोंद करण्यात आली आहे.
मिळालेल्या माहितीनुसार, मयत जयेश राणे हा दारूच्या व्यसनाच्या आहारी गेलेला होता. १३ ऑक्टोबर २०२६ रोजी सकाळी ११ वाजण्याच्या सुमारास त्याने शेजवली वरचीवाडी येथील स्वतःच्या राहत्या घरातील स्वयंपाक खोलीत छताच्या लाकडी बाराला नायलॉनच्या दोरीच्या साहाय्याने गळफास लावून घेतला. हा प्रकार कुटुंबीय व स्थानिकांच्या निदर्शनास आल्यानंतर परिसरात एकच खळबळ उडाली. या घटनेची माहिती मिळताच पोलिसांनी घटनास्थळी धाव घेऊन पंचनामा केला. १३ ऑक्टोबर रोजी सायंकाळी सव्वासहा वाजण्याच्या सुमारास याप्रकरणी पोलिसांत अधिकृत नोंद करण्यात आली असून, राजापूर पोलीस पुढील कायदेशीर तपास करत आहेत.
