रत्नागिरी: येथील मारुती मंदिर येथे उद्योजक संतोष तावडे यांच्या हस्ते श्रीफळ वाढवून व ध्वजाला पुष्पहार अर्पण करून श्री शिवप्रतिष्ठान हिंदुस्थानतर्फे श्री दुर्गामाता दौडचा प्रारंभ करण्यात आला.
दरवर्षीप्रमाणे घटस्थापना ते विजयादशमी या कालावधीत ही दौड आयोजित केली असून याला युवकांचा उत्स्फूर्त प्रतिसाद मिळत आहे.
पहिल्या दिवशी दौड मारुती मंदिर, माळनाका, श्री व्याघ्रेश्वरी अंबामाता मंदिर, जैन नगर, एकता मार्ग, मारुती मंदिर या मार्गे निघाली. दररोज मारुती मंदिर येथून दौडीला सुरवात होणार आहे. उद्या, दि. १५ रोजी आई माऊली मित्रमंडळ, सन्मित्रनगर, १६ ला थिबा पॅलेस रोड मित्रमंडळ आणि १७ रोजी श्री नवलाई देवी मंदिर-नाचणे येथील दुर्गामातेचे दर्शन घेण्यात येणार आहे. १८ ऑक्टोबरला रविवारी तेली आळी नाका येथून दौडीला सुरवात होईल. या दिवशी झाडगावच्या श्री जोगेश्वरी देवीचे दर्शन आणि १९ला जय भैरव नवरात्र मंडळ मांडवी आणि तेली आळी मित्रमंडळाच्या देवीचे दर्शन घेतले जाईल.
विजयादशमी २० ऑक्टोबरला असून या दिवशी मारुती मंदिर येथून दुचाकीने रत्नदुर्ग किल्ल्यावरील जाऊन तेथून श्री देवी भगवतीचे दर्शन घेण्यात येणार आहे. यानंतर या दौडीची सांगता होणार आहे. यामध्ये सहभागी होण्याचे आवाहन जयदीप साळवी आणि वैभव पांचाळ यांनी केले आहे. घटस्थापना ते विजयादशमी या कालावधीत सुरू असणाऱ्या श्री दुर्गामाता दौडीच्या उपक्रमात सर्व हिंदूंनी उत्स्फूर्तपणे सहभागी व्हावे, असे आवाहन श्री शिवप्रतिष्ठान हिंदुस्थान रत्नागिरीतर्फे करण्यात आले.
