राजापूर: तालुक्यातील गोवळ आणि विल्ये या दोन गावांना जोडणाऱ्या अर्जुना नदीवरील बहुप्रतिक्षित मोठ्या पुलाच्या उभारणीसाठी अखेर केंद्रीय मार्ग निधी (सीआरएफ) २०२४-२५ अंतर्गत तब्बल २५ कोटी रुपयांच्या भरीव निधीला मंजुरी मिळाली आहे. राज्याचे माजी मुख्यमंत्री तथा रत्नागिरी-सिंधुदुर्ग लोकसभा मतदारसंघाचे खासदार नारायण राणे यांनी केंद्र व राज्य स्तरावर केलेल्या सातत्यपूर्ण पाठपुराव्यामुळे या महत्त्वाकांक्षी कामाला सार्वजनिक बांधकाम विभागाकडून प्रशासकीय मान्यता प्रदान करण्यात आली आहे. गेल्या अनेक वर्षांपासून गोवळ आणि विल्ये परिसरातील ग्रामस्थ अर्जुना नदीवर पक्का व मोठा पूल उभारण्यात यावा यासाठी सातत्याने प्रशासनाकडे मागणी करत होते.
पावसाळ्यात नदीला येणाऱ्या पुरामुळे दोन्ही गावांमधील संपर्क तुटून ग्रामस्थ, विद्यार्थी आणि शेतकऱ्यांची मोठी गैरसोय होत होती. मंजूर करण्यात आलेल्या २५ कोटी रुपयांच्या या निधीतून केवळ भव्य पुलाची उभारणीच होणार नसून, पुलाला जोडणारे मजबूत जोडरस्ते आणि अन्य पूरक कामेही पूर्ण केली जाणार आहेत. या पुलाच्या निर्मितीमुळे परिसरातील दळणवळण अधिक गतिमान आणि सुरक्षित होणार असून स्थानिक वाहतूक, व्यापार तसेच दैनंदिन व्यवहारांना मोठा हातभार लागणार आहे. प्रकल्पाला प्रशासकीय मंजुरी मिळाल्यामुळे आता पुढील तांत्रिक प्रक्रिया, निविदा आणि इतर कार्यालयीन सोपस्कार पूर्ण होऊन लवकरच प्रत्यक्ष कामाचा नारळ फुटणार आहे. गेली अनेक वर्षे रखडलेल्या या जिव्हाळ्याच्या प्रश्नाला खा. नारायण राणे यांच्या पुढाकारामुळे गती मिळाल्याने स्थानिक ग्रामस्थांनी समाधान व्यक्त करत खा. राणे यांचे मनापासून आभार मानले आहेत.
