खेड: खेड-भरणे मुख्य रस्त्यावर सार्वजनिक बांधकाम विभागामार्फत सध्या सुरू असलेल्या गटाराच्या विसंगत कामावरून मोठा वाद निर्माण झाला असून, रस्त्याच्या अगदी कडेला असलेल्या एका झाडाला चक्क वळसा घालून हे गटार नागमोडी पद्धतीने बांधण्यात आल्याचा गंभीर आरोप काँग्रेसचे गौस खतीब यांनी केला आहे. रस्त्यावरील या गटाराच्या कामाची प्रत्यक्ष पाहणी केली असता हा अजब प्रकार निदर्शनास आल्याचे सांगत, गटाराचे काम सरळ रेषेत करण्याऐवजी अशा विचित्र पद्धतीने केल्यामुळे त्यांनी सार्वजनिक बांधकाम विभागाच्या कामाच्या एकंदरीत नियोजनावरच थेट प्रश्नचिन्ह उपस्थित केले आहे.
या नागमोडी व अयोग्य पद्धतीने केलेल्या बांधकामामुळे विशेषतः रात्रीच्या वेळी या मार्गावरून जाणाऱ्या दुचाकीस्वारांना अपघाताचा मोठा धोका निर्माण होण्याची दाट शक्यता वर्तवली जात आहे. त्यामुळे सार्वजनिक बांधकाम विभागाने या प्रकाराची तात्काळ दखल घेऊन बांधकामात आवश्यक त्या सुधारणा कराव्यात, गटाराचे बांधकाम योग्य पद्धतीने करून ते पूर्णपणे सरळ रेषेत आणावे आणि संभाव्य अपघात टाळण्यासाठी आवश्यक ती सुरक्षाव्यवस्था उभारावी, अशी आग्रही मागणी काँग्रेसच्या वतीने करण्यात आली आहे. प्रशासनाने या गंभीर समस्येकडे वेळीच लक्ष न दिल्यास आणि मागणीकडे दुर्लक्ष केल्यास तीव्र आंदोलन छेडण्यात येईल, असा स्पष्ट इशाराही गौस खतीब यांनी दिला आहे. या इशाऱ्यानंतर आता सार्वजनिक बांधकाम विभाग या प्रकरणी नेमकी काय भूमिका घेतो आणि धोकादायक ठरणाऱ्या या बांधकामात तातडीने काय सुधारणा करतो, याकडे स्थानिक नागरिकांचे लक्ष लागले आहे.
