रत्नागिरी : रत्नागिरी शहरातील काझी चाळ, उद्यमनगर परिसरात पोलिसांनी कारवाई करत तब्बल १ किलो २९१ ग्रॅम गांजा जप्त केला आहे. या गांजाची एकूण किंमत ८० हजार १०० रुपये असून, अमली पदार्थांची बेकायदेशीर विक्री करण्याच्या उद्देशाने तो जवळ बाळगल्याप्रकरणी एका २७ वर्षीय तरुणाविरुद्ध रत्नागिरी शहर पोलीस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, साहिल समीर सोलकर (वय २७, रा. मराठी शाळेजवळ, कोकणनगर, रत्नागिरी) असे गुन्हा दाखल झालेल्या संशयित आरोपीचे नाव आहे. ८ नोव्हेंबर २०२६ रोजी सायंकाळी ४.३३ वाजण्याच्या सुमारास काझी चाळ, उद्यमनगर, रत्नागिरी येथे ही कारवाई करण्यात आली.
या कारवाईत संशयिताकडून हिरव्या-काळ्या रंगाचा उग्र वास असलेला गांजा जप्त करण्यात आला. त्यामध्ये एका पारदर्शक प्लास्टिकच्या पिशवीत काळ्या रंगाच्या चिकट पट्टीने गुंडाळून ठेवलेला ९१० ग्रॅम गांजा आढळला. त्याची किंमत ६० हजार रुपये असल्याचे नमूद करण्यात आले आहे. तसेच निळ्या रंगाच्या प्लास्टिकच्या पिशवीत ३८१ ग्रॅम गांजा आढळून आला असून, त्याची किंमत २० हजार रुपये आहे. याशिवाय गांजा ठेवण्यासाठी वापरलेल्या पिशव्या आणि काळ्या रंगाची प्रवासी बॅग असा मुद्देमालही पोलिसांनी ताब्यात घेतला आहे.
या प्रकरणी रत्नागिरी शहर पोलीस ठाण्यात गुन्हा रजिस्टर क्रमांक ४६३/२०२६ अन्वये एन.डी.पी.एस. कायदा १९८५ मधील कलम ८(क), २०(ब)(ii)(ब) प्रमाणे गुन्हा दाखल करण्यात आला आहे. या प्रकरणी रत्नागिरी शहर पोलीस ठाण्याचे पोलीस हवालदार राजेश भास्करराव भुजबळ (वय ५५) यांनी फिर्याद दिली आहे.
शहरातील उद्यमनगर परिसरात झालेल्या या कारवाईमुळे अमली पदार्थांच्या बेकायदेशीर व्यवहाराचा मुद्दा पुन्हा चर्चेत आला आहे. या गांजाचा पुरवठा नेमका कुठून झाला आणि त्यामागे आणखी कोणाचा सहभाग आहे का, याबाबत पोलिसांकडून तपास केला जात आहे.
