रोहा : राष्ट्रवादी काँग्रेसचे प्रदेशाध्यक्ष खासदार सुनील तटकरे यांच्यावर शिवसेनेचे ज्येष्ठ नेते रामदास कदम यांच्याकडून सातत्याने होत असलेल्या टीकेमुळे रायगड जिल्ह्यातील राजकीय वातावरण चांगलेच तापले असून, या विधानांचा रोहा येथे राष्ट्रवादी काँग्रेसच्या वतीने जाहीर निषेध नोंदवण्यात आला. या पार्श्वभूमीवर महिला व बालविकास मंत्री आदिती तटकरे यांनी रामदास कदम यांच्यावर थेट निशाणा साधत, काही लोकांना केवळ आपापल्या पद्धतीने चर्चेत राहण्याची सवय असते, मात्र चर्चेत राहताना आपण नेमके कोणत्या स्तरावर जात आहोत याचे भान प्रत्येकाने ठेवले पाहिजे, असा जोरदार टोला लगावला. महायुतीमधील काही विशिष्ट नेते सातत्याने इतर घटक पक्षांविषयी नकारात्मक भूमिका मांडत असल्याबद्दल तीव्र नाराजी व्यक्त करतानाच, नेत्यांनी किंवा कार्यकर्त्यांनी दुखावले जाईल असे वर्तन टाळावे; अन्यथा अशा अंतर्गत वादामुळे जनतेमध्ये महायुती सरकारबद्दल विनाकारण शंका-कुशंका निर्माण होतात, असा स्पष्ट इशाराही त्यांनी दिला.
दरम्यान, यंदाची दिवाळी राज्यावरील दुष्काळाच्या सावटामुळे आव्हानात्मक ठरली असून नुकसानग्रस्त शेतकरी बांधवांना भरपाई आणि दुष्काळग्रस्त तालुक्यांसाठी विशेष पॅकेज मिळवून देण्यासाठी शासनस्तरावर युद्धपातळीवर काम सुरू असल्याचे सांगत, महायुती शेतकऱ्यांच्या पाठीशी खंबीरपणे उभी राहूनच ही दिवाळी साजरी करत असल्याचे त्यांनी नमूद केले; तसेच माजी आमदार राजेश पाटील यांची गोकुळच्या अध्यक्षपदी नियुक्ती झाल्याबद्दल त्यांचे मनःपूर्वक अभिनंदन करत महायुतीच्या माध्यमातून त्यांचा कार्यकाळ यशस्वी ठरेल, असा विश्वासही त्यांनी यावेळी व्यक्त केला.
