चिपळूण: तालुक्यातील मिरजोळी गावच्या कन्या डॉ. असीला हसन अली खान दलवाई यांनी Master of Dental Surgery (MDS) मधील Prosthodontics या शाखेत पदव्युत्तर पदवी यशस्वीरीत्या संपादन करत दंतवैद्यकीय क्षेत्रात उल्लेखनीय यश संपादन केले आहे. अत्यंत चुरशीची समजली जाणारी NEET-PG परीक्षा उत्तीर्ण झाल्यानंतर त्यांनी दिल्लीजवळील संतोष मेडिकल युनिव्हर्सिटी, गाझियाबाद येथून ही उच्च पदवी प्राप्त केली. त्यांच्या या यशाने चिपळूण तालुक्याच्या शिरपेचात मानाचा तुरा रोवला गेला असून, गावासह परिसरातून त्यांचे सर्वत्र कौतुक होत आहे.
असीला यांच्या शालेय शिक्षणाची सुरुवात मिरजोळी येथील नॅशनल इंग्लिश मीडियम स्कूलमधून झाली होती. त्यांचे वडील नोकरीच्या निमित्ताने मस्कत येथे वास्तव्यास असल्याने पुढील शिक्षण त्यांनी मस्कत येथे पूर्ण केले. लहानपणापासूनच अभ्यासात अत्यंत हुशार असलेल्या असीला यांनी नेरूळ येथील प्रसिद्ध तेरणा मेडिकल कॉलेजमधून दंतचिकित्सेची पदवी प्राप्त केली. त्यानंतर वैद्यकीय क्षेत्रातील उच्च शिक्षणाचा ध्यास घेत अखंड मेहनत, जिद्द आणि अभ्यासपूर्ण सातत्याच्या जोरावर त्यांनी गाझियाबादमधून पदव्युत्तर शिक्षण पूर्ण करत आपल्या शैक्षणिक गुणवत्तेचा ठसा उमटवला.
मिरजोळी गावातील जुन्या पिढीतील अत्यंत आदरणीय व शिस्तप्रिय व्यक्तिमत्त्व म्हणून परिचित असलेले गुरुजी कै. अली मास्तर यांची असीला या नात असून, गोवळकोट येथील जुन्या पिढीतील ओलिमिया मुकादम यांच्याही त्या नात आहेत. दंतचिकित्सा क्षेत्रात मिळवलेल्या या नेत्रदीपक यशाबद्दल त्यांचे कुटुंबीय, नातेवाईक, आप्तेष्ट, मित्रपरिवार तसेच मिरजोळी व चिपळूण परिसरातील नागरिकांकडून त्यांच्यावर शुभेच्छा आणि अभिनंदनाचा वर्षाव होत आहे.
