गणपतीपुळे/ वैभव पवार : रत्नागिरी तालुक्यातील सुप्रसिद्ध तीर्थक्षेत्र असलेल्या गणपतीपुळे येथे मंगळवार, २९ सप्टेंबर रोजी अंगारकी चतुर्थी यात्रोत्सव अतिशय भक्तीभावात, शिस्तबद्ध आणि शांततेत संपन्न झाला. या पवित्र पर्वणीनिमित्त घाटमाथ्यावरून आलेल्या सुमारे ५० ते ६० हजार भाविकांनी स्वयंभू श्री गणेशाचे मनोभावे दर्शन घेतल्याची माहिती गणपतीपुळे देवस्थान समितीकडून देण्यात आली. पहाटेपासूनच सुरू झालेला ‘मंगलमूर्ती मोरया’चा गजर आणि अलोट गर्दीमुळे संपूर्ण परिसर भक्तिरसात न्हाऊन निघाला होता.
अंगारकी चतुर्थीनिमित्त मंदिराचे दरवाजे पहाटे साडेतीन वाजता उघडण्यात आले. मुख्य पुजाऱ्यांच्या हस्ते विधिवत पूजाअर्चा, मंत्रपुष्पांजली आणि महाआरती संपन्न झाल्यानंतर सर्वसामान्य भाविकांना दर्शनासाठी मंदिरात प्रवेश देण्यात आला. भाविकांना सुलभ व जलद दर्शन घेता यावे यासाठी देवस्थान समितीने चोख बॅरिकेडिंग आणि स्वतंत्र दर्शन रांगांची उभारणी केली होती. रांगेत उभ्या असलेल्या भाविकांसाठी शुद्ध पिण्याचे पाणी आणि इतर आवश्यक मूलभूत सुविधांची उत्तम व्यवस्था करण्यात आली होती. गर्दीचे नियोजन करण्यासाठी पोलिसांसोबतच श्री अनिरुद्ध बापू उपासना ट्रस्टच्या स्वयंसेवकांनी अत्यंत मोलाचे सहकार्य केले.
सुरक्षेच्या दृष्टीने जयगड पोलीस ठाण्याच्या अखत्यारीत १५ पोलीस अधिकारी आणि १३८ पोलीस अंमलदारांचा मोठा बंदोबस्त मंदिर आणि परिसरात तैनात होता. यामध्ये वाहतूक पोलिसांचाही विशेष सहभाग राहिला. समुद्रकिनाऱ्यावर कोणतीही दुर्घटना घडू नये यासाठी होमगार्ड, जीवरक्षक आणि देवस्थानच्या सुरक्षारक्षकांकडून सातत्याने किनारी भागात गस्त घातली जात होती. संभाव्य आपत्कालीन स्थिती लक्षात घेता रत्नागिरी नगर परिषदेची अग्निशामक बंब गाडी, देवस्थानची रुग्णवाहिका आणि मालगुंड प्राथमिक आरोग्य केंद्राचे वैद्यकीय पथक औषधोपचारासह घटनास्थळी सज्ज होते.
घाटमाथ्यावरील भाविकांची गर्दी लक्षात घेऊन एसटी महामंडळाने रत्नागिरी आगारातून जादा बसेसची सोय केली होती, ज्यामुळे प्रवाशांची मोठी सोय झाली. यात्रेनिमित्त घाटमाथ्यावरून दाखल झालेल्या विविध व्यावसायिकांमुळे मंदिर परिसरात मोठी बाजारपेठ फुलली होती, तर कोल्हापूर व सांगली येथील गणेश मंडळांच्या वतीने सकाळच्या सत्रात खिचडी आणि सायंकाळी महाप्रसादाचे वाटप करण्यात आले. सायंकाळी साडेचार वाजता ढोल-ताशांचा गजर, फटाक्यांची आतषबाजी आणि जयघोषात स्वयंभू श्रींची पारंपरिक पालखी मिरवणूक थाटात निघाली. या मिरवणुकीत स्थानिक ग्रामस्थ, पुजारी, पोलीस आणि भाविक मोठ्या संख्येने सहभागी झाले होते. देवस्थान समिती, ग्रामपंचायत प्रशासन आणि पोलीस यंत्रणेच्या काटेकोर समन्वयामुळे हा भव्य यात्रोत्सव अत्यंत शांततेत आणि यशस्वीपणे पार पडला.
