संगमेश्वर (दिनेश अब्रे) : परशुरामाच्या पदस्पर्शाने पावन झालेल्या रत्नागिरी जिल्ह्यातील चिपळूण तालुक्याने राज्याला अनेक आरोग्य रत्ने दिली आहेत. याच परंपरेत आता निवळी (कोंडवाडी) येथील एका सामान्य कुटुंबातील तरुणाने आपल्या जिद्दीच्या जोरावर वैद्यकीय क्षेत्रात उत्तुंग भरारी घेतली आहे. स्थानिक शाळेत प्रामाणिकपणे शिपाई पदावर कार्यरत असलेले आदर्श नागरिक रमेश भाई भालचंद्र शिंदे आणि त्यांची पत्नी सुलभा शिंदे यांच्या कष्टाचे चीज झाले असून, त्यांचा सुपुत्र पंकज रमेश शिंदे याने ‘बीएएमएस’ (BAMS) ही पदवी संपादन करून डॉक्टर होण्याचे आई-वडिलांचे स्वप्न अखेर प्रत्यक्षात आणले आहे. मध्यमवर्गीय कौटुंबिक पार्श्वभूमी असतानाही पती-पत्नीने अपार मेहनत घेत पंकजच्या शिक्षणासाठी सर्वतोपरी पाठबळ दिले, तर पंकजनेही लहानपणापासूनच कठोर परिश्रम आणि चिकाटीच्या जोरावर या विश्वासाला सार्थ ठरवले.
शालेय जीवनापासूनच अत्यंत हुशार असलेल्या पंकजने निवळी हायस्कूलमधून इयत्ता दहावीत घरीच अभ्यास करून तब्बल ९६ टक्के गुणांसह प्रथम श्रेणी पटकावली होती. पुढे वैद्यकीय क्षेत्रात पदार्पण करण्याची मनीषा बाळगून त्याने कालिदास कॉलेजमधून आपले उच्च शिक्षण पूर्ण केले. या खडतर शैक्षणिक प्रवासात आजोबा भालचंद्र शिंदे यांचे बहुमोल मार्गदर्शन, बहीण सानिका हिची साथ आणि नातेवाईकांचे मोठे प्रोत्साहन लाभले. या यशात भाई शिंदे (बुवा), हवालदार विजय राठोड आणि नातेवाईकांचे विशेष सहकार्य लाभल्याचे डॉ. पंकज शिंदे यांनी कृतज्ञतापूर्वक नमूद केले. वैद्यकीय पदवी प्राप्त झाल्यानंतर मित्रमंडळींनी एकत्र येत त्याचा छोटेखानी सत्कार करत आनंद साजरा केला.
दुर्गम आणि डोंगराळ भागांमध्ये रात्री-अपरात्री आरोग्य आणीबाणीच्या काळात हक्काच्या डॉक्टरांची भासणारी उणीव लक्षात घेता, डॉ. पंकज यांच्या रूपाने आता निवळी-कोंडवाडी परिसराला एक हक्काचा डॉक्टर लाभला आहे. आपल्या मुलाने घेतलेली ही गगनभरारी पाहून वडील रमेश भाई शिंदे यांच्यासह आईच्या डोळ्यांत आनंदाश्रू तरळले असून, त्यांचे जीवन सार्थक झाल्याची भावना त्यांनी व्यक्त केली. या प्रेरणादायी यशाबद्दल निवळी पंचक्रोशीत अत्यंत आनंदाचे वातावरण पसरले असून डॉ. पंकज शिंदे यांच्यावर सर्व स्तरांतून कौतुकाचा आणि शुभेच्छांचा वर्षाव होत आहे.
