रत्नागिरी: केंद्रीय मुख्य निवडणूक आयुक्त ज्ञानेशकुमार यांच्या राजीनाम्याच्या मागणीसाठी आणि निवडणूक प्रक्रियेतील पारदर्शकतेसाठी महाराष्ट्र नवनिर्माण सेनेच्या वतीने रत्नागिरीतील मारुती मंदिर सर्कल येथे जोरदार स्वाक्षरी मोहीम राबविण्यात आली. मनसे अध्यक्ष राज ठाकरे यांच्या आदेशानुसार आयोजित करण्यात आलेल्या या मोहिमेला रत्नागिरीकर नागरिकांनी उत्स्फूर्त प्रतिसाद देत मोठ्या संख्येने आपल्या स्वाक्षऱ्या नोंदवल्या.
सध्याच्या निवडणूक प्रणालीबाबत सर्वसामान्य जनतेमध्ये निर्माण झालेल्या संशयास्पद वातावरणाच्या पार्श्वभूमीवर ही मोहीम हाती घेण्यात आली. संपूर्ण SIR प्रक्रिया तातडीने रद्द करण्यात यावी, आगामी सर्व निवडणुका या पारंपारिक बॅलेट पेपरवर (मतपत्रिकेवर) घेण्यात याव्यात आणि संपूर्ण निवडणूक प्रक्रियेत पारदर्शकता आणण्यात यावी, अशा प्रमुख मागण्या या स्वाक्षरी मोहिमेच्या माध्यमातून लावून धरण्यात आल्या. निवडणूक आयोगाच्या कारभारावर तीव्र आक्षेप घेत मुख्य निवडणूक आयुक्तांनी आपल्या पदाचा राजीनामा द्यावा, असा सूर या वेळी व्यक्त करण्यात आला.
मनसेचे रत्नागिरी उपजिल्हाध्यक्ष रुपेश जाधव यांच्या नेतृत्वाखाली ही धडक मोहीम राबविण्यात आली. या प्रसंगी रत्नागिरी शहर तसेच तालुक्यातील मनसेचे प्रमुख पदाधिकारी आणि मोठ्या संख्येने महाराष्ट्र सैनिक उपस्थित होते. निवडणूक पद्धतीत सुधारणा आणि निष्पक्ष निवडणुकांसाठी मनसेने आक्रमक पवित्रा घेत नागरिकांच्या स्वाक्षऱ्या गोळा करून जनमताचा कौल स्पष्टपणे मांडला आहे.
