लांजा: हर्दखळे ग्रामपंचायतीच्या कामकाजासंदर्भात दाखल केलेल्या तब्बल २१ ऑनलाइन माहिती अधिकार अर्जांवर कोणतीही माहिती न मिळाल्याने आणि वरिष्ठ स्तरावरून निर्देश देऊनही प्रशासनाकडून टाळाटाळ होत असल्याने, हर्दखळे येथील रहिवासी किरण दत्ताराम चव्हाण यांनी लांजा पंचायत समितीसमोर लाक्षणिक उपोषणाचा इशारा दिला आहे. येत्या २४ ऑक्टोबरपर्यंत संबंधित प्रकरणांची निष्पक्ष चौकशी करून दप्तर तपासणीची निश्चित वेळ व तारीख लेखी स्वरूपात न दिल्यास २६ ऑक्टोबर रोजी हे उपोषण करण्यात येईल, असा स्पष्ट इशारा त्यांनी दिला आहे.
मिळालेल्या माहितीनुसार, किरण चव्हाण यांनी मे २०२६ पासून माहितीचा अधिकार अधिनियम, २००५ अंतर्गत हर्दखळे ग्रामपंचायतीशी संबंधित विकासकामे, चौदावा वित्त आयोग, नवीन इमारत बांधकाम, नळ जोडणी यादी अशा विविध विषयांवर एकूण २१ ऑनलाइन अर्ज सादर केले होते. मात्र विहित मुदत उलटून गेल्यानंतरही ग्रामसेविका यांच्याकडून कोणतीही कायदेशीर माहिती उपलब्ध करून देण्यात आली नाही. याप्रकरणी त्यांनी दाखल केलेल्या प्रथम अपीलावरही सुनावणी न झाल्याने प्रशासकीय पारदर्शकतेवर मोठे प्रश्नचिन्ह निर्माण झाले आहे.
तक्रारदार चव्हाण यांनी उपमुख्य कार्यकारी अधिकारी (ग्रामपंचायत) यांच्याकडे दाद मागितल्यानंतर, जिल्हा परिषद कार्यालयाने लांजा गटविकास अधिकाऱ्यांना चौकशी करून अहवाल देण्याचे निर्देश पत्राद्वारे दिले होते. मात्र त्या निर्देशांची प्रत्यक्ष अंमलबजावणी न झाल्याने तक्रारदाराची कोणतीही दाद घेतली गेली नाही. यापूर्वी १५ ऑगस्ट रोजी करण्यात येणारे आंदोलन प्रशासनाच्या विनंतीवरून मागे घेण्यात आले होते, मात्र त्यानंतरही संबंधित अधिकाऱ्यांवर कोणतीही ठोस कारवाई करण्यात आली नाही.
या संपूर्ण प्रकरणाची माहिती जिल्हाधिकारी, मुख्य कार्यकारी अधिकारी, उपमुख्य कार्यकारी अधिकारी तसेच पोलीस प्रशासनाला ई-मेल व निवेदनाद्वारे देण्यात आली आहे. वारंवार पाठपुरावा करूनही दप्तर तपासणी आणि कायदेशीर कार्यवाहीबाबत टाळाटाळ होत असल्याने, आता २४ ऑक्टोबरपर्यंत मागण्या मान्य न झाल्यास २६ ऑक्टोबरला लांजा पंचायत समिती येथे शांततापूर्ण मार्गाने लाक्षणिक उपोषण छेडण्याचा पवित्रा तक्रारदाराने घेतला असून, यामुळे पंचायत समिती वर्तुळात खळबळ उडाली आहे.
