कोल्हापूर: शानशौकीची भयंकर आवड, झटपट श्रीमंत होण्याची नशा आणि महागड्या गाड्यांची भुरळ डोक्यात शिरल्याने एका १९ वर्षांच्या तरुणाने थेट कौटुंबिक विश्वासाचाच गळा घोटल्याचा धक्कादायक आणि तेवढाच चक्रावून टाकणारा प्रकार कोल्हापूर जिल्ह्यातील पन्हाळा तालुक्यातील सातवे गावात उघडकीस आला आहे. डिप्लोमा इंजिनिअरिंगचे शिक्षण घेणाऱ्या समर पोकट चव्हाण याने घराशेजारीच राहणारे सख्खे चुलत चुलते उमेश मारुती चव्हाण यांच्या घरातील विश्वासाचा गैरफायदा घेत त्यांच्या लोखंडी तिजोरीतून तब्बल १४.५ लाख रुपये किमतीचे १५ तोळे सोन्याचे दागिने लंपास केले. चोरलेले हे सोने त्याने सांगली जिल्ह्यातील शिराळा तालुक्यातील देववाडी येथील सोनार संग्राम बाबासो मोरे याला अवघ्या १० लाख रुपयांत विकले आणि त्या पैशांतून दसऱ्याच्या शुभमुहूर्तावर दारात थाटामाटात नवी कोरी महिंद्रा थार गाडी उभी केली. विशेष म्हणजे, ज्या चुलत्याच्या दागिन्यांवर डल्ला मारून ही गाडी घेतली, त्याच उमेश चव्हाण यांच्या कुटुंबाला थारच्या पूजनासाठी आणि नारळ फोडण्यासाठी प्रमुख पाहुणे म्हणून अत्यंत आदराने निमंत्रित करण्यात आले.
पूजेच्या कार्यक्रमासाठी निघताना उमेश चव्हाण यांच्या पत्नीने अंगावर घालण्यासाठी दागिन्यांचा डबा शोधला असता तिजोरी रिकामी असल्याचे पाहून चव्हाण कुटुंबीयांच्या पायाखालची जमीन सरकली. तिजोरीत बाजूलाच असलेले आजीचे सोने सुरक्षित ठेवून केवळ उमेश चव्हाण यांचेच १५ तोळे सोने गायब झाल्याने चोरी घरातीलच भेदूने केल्याचा संशय बळावला. याप्रकरणी कोडोली पोलीस ठाण्यात तक्रार दाखल होताच पोलीस उपअधीक्षक श्रीकांत ठिकाणे यांच्या मार्गदर्शनाखाली पोलिसांनी वेगाने चक्रे फिरवली. गावात समर चव्हाण याच्या दारात अचानक उभी राहिलेली १० लाखांची महागडी थार पोलिसांच्या रडारवर आली. चौकशीत समरने शेअर ट्रेडिंगमधून नफा मिळाल्याचा कांगावा करून पोलिसांची दिशाभूल करण्याचा केविलवाणा प्रयत्न केला, मात्र पोलिसी खाक्या दाखवताच आणि बँक खात्यात सोनाराकडून जमा झालेले ३ लाख ४० हजार रुपये समोर येताच समर कोलमडला व त्याने गुन्ह्याची कबुली दिली. कोणत्याही पावतीशिवाय बेकायदेशीरपणे सोने खरेदी करून बँकेत गहाण ठेवणाऱ्या सोनार संग्राम मोरे यालाही पोलिसांनी बेड्या ठोकल्या. पोलिसांनी चोरीचे सर्व १५ तोळे सोने, महिंद्रा थार कार आणि मोटारसायकल असा एकूण ३० लाख ५१ हजार रुपयांचा मुद्देमाल जप्त केला असून पन्हाळा न्यायालयाने दोन्ही आरोपींना ३ दिवसांची पोलीस कोठडी सुनावली आहे. या भयानक आणि नात्याला काळीमा फासणाऱ्या चोरीच्या अजब प्रकरणाने सध्या संपूर्ण जिल्ह्यात मोठी खळबळ उडवून दिली आहे.
