रत्नागिरी: महाराष्ट्र नवनिर्माण सेना रत्नागिरी विधानसभा क्षेत्राच्या वतीने आयोजित करण्यात आलेल्या पर्यावरणपूरक घरगुती गणपती सजावट स्पर्धेचा निकाल रविवारी जाहीर करण्यात आला. निसर्गाचे रक्षण आणि पर्यावरणपूरक उत्सवाला प्रोत्साहन देण्याच्या उद्देशाने घेतलेल्या या स्पर्धेत मावळंगे येथील अजय प्रकाश पारकर यांच्या दगडी चित्रकला सजावटीने प्रथम क्रमांक पटकावून बाजी मारली.
स्पर्धेत सादर झालेल्या नावीन्यपूर्ण आणि कल्पक देखाव्यांमधून परीक्षकांनी विजेत्यांची निवड केली. यामध्ये गावडे आंबेरे येथील रजनीश रामजी वासावे यांच्या केदारेश्वर मंदिर गुहा देखाव्याने द्वितीय, तर रत्नागिरी शहरातील विश्वनगर येथील श्रेयस अजित मयेकर यांच्या धूतपापेश्वर मंदिर देखाव्याने तृतीय क्रमांक संपादन केला. याशिवाय गोळप येथील सुतेज हरिश्चंद्र भाटकर यांच्या निसर्ग वाचवा या महत्त्वपूर्ण सामाजिक संदेश देणाऱ्या देखाव्याची उत्तेजनार्थ पारितोषिकासाठी निवड करण्यात आली.
पर्यावरणाचे संवर्धन करत गणेशोत्सव साजरा करणाऱ्या सर्व विजेत्यांचे तसेच स्पर्धेत उत्साहाने सहभागी झालेल्या सर्व स्पर्धकांचे मनसे उपजिल्हाध्यक्ष तथा स्पर्धेचे आयोजक रूपेश जाधव यांनी मनःपूर्वक अभिनंदन केले. या उपक्रमातील सर्व विजेत्यांचा लवकरच एका विशेष पारितोषिक वितरण समारंभात गौरव करण्यात येणार असून, या कार्यक्रमाची तारीख लवकरच जाहीर केली जाईल, अशी माहिती जाधव यांनी दिली आहे.
