कादंबरीकार मंजू कपूर यांच्या साहित्यावरील संशोधनाला मान्यता
राजापूर: येथील रयत शिक्षण संस्थेच्या आबासाहेब मराठे कला, न्यू कॉमर्स आणि सायन्स कॉलेजमधील इंग्रजी विभागाच्या प्राध्यापिका मंजुषा दादाबा सूर्यवंशी यांना सावित्रीबाई फुले पुणे विद्यापीठाने इंग्रजी विषयातील सर्वोच्च अशी ‘पीएच.डी.’ (विद्यावाचस्पती) पदवी नुकतीच प्रदान केली आहे. सासवड (पुणे) येथील वाघिरे कला, वाणिज्य व विज्ञान महाविद्यालयाच्या संशोधन केंद्रातून त्यांनी डॉ. गणेश सोनवणे यांच्या मार्गदर्शनाखाली हे महत्त्वपूर्ण संशोधन पूर्ण केले असून, या उल्लेखनीय यशाबद्दल त्यांचे राजापूर तालुक्यासह संपूर्ण शैक्षणिक वर्तुळातून विशेष कौतुक केले जात आहे.
प्रा. मंजुषा सूर्यवंशी यांनी सादर केलेल्या प्रबंधात भारतीय इंग्रजी साहित्यातील प्रख्यात लेखिका मंजू कपूर यांच्या निवडक कादंबऱ्यांमधील स्त्री पात्रांच्या विविध पैलूंचा सखोल आणि समीक्षात्मक वेध घेण्यात आला आहे. “A Study of Silence and Resilience in the Select Novels of Manju Kapur” या विषयांतर्गत त्यांनी भारतीय मध्यमवर्गीय स्त्रीजीवनातील मानसिक ताणतणाव, पारंपरिक कौटुंबिक चौकट आणि पितृसत्ताक सामाजिक बंधनांच्या पार्श्वभूमीवर स्त्रियांवर लादले गेलेले मौन ही त्यांची कमकुवतता नसून तो एक अबोल प्रतिकार असतो, हे प्रभावीपणे मांडले आहे. प्रतिकूल परिस्थितीवर मात करत स्त्रिया आत्मभान, शिक्षण, जिद्द आणि मानसिक कणखरतेच्या बळावर स्वतःचे स्वतंत्र अस्तित्व कसे निर्माण करतात, याचे दिशादर्शक विश्लेषण या संशोधनात करण्यात आले असून आधुनिक स्त्रीवादी साहित्याच्या दृष्टीने या अभ्यासाची प्रशंसा होत आहे. अध्यापनातील प्रदीर्घ अनुभवासोबत सातत्याने उच्च दर्जाचे संशोधन आणि नवनवीन शैक्षणिक तंत्रज्ञानाचा अंगीकार करणाऱ्या प्रा. सूर्यवंशी यांच्या या यशाबद्दल त्यांचे संशोधन मार्गदर्शक डॉ. गणेश सोनवणे, संशोधन केंद्राचे समन्वयक व विभाग प्रमुख डॉ. संजय झगडे, रयत शिक्षण संस्थेच्या दक्षिण विभागाच्या चेअरमन श्रीमती संगीताताई पाटील, महाविद्यालय विकास समितीचे प्रमुख विक्रांत पाटील, प्राचार्य डॉ. राजाराम राठोड तसेच संशोधन समितीचे प्रमुख हेमंतकुमार अकोलकर यांच्यासह विविध क्षेत्रांतील मान्यवरांनी अभिनंदन करून त्यांच्या पुढील वाटचालीस शुभेच्छा दिल्या आहेत.
