उल्हासनगर : पोलीस विभागामार्फत शहराच्या सुरक्षेसाठी उभारण्यात आलेल्या सीसीटीव्ही कॅमेऱ्याच्या लोखंडी खांबात अचानक वीजप्रवाह उतरल्याने एका २६ वर्षीय तरुणीचा जागीच विजेचा तीव्र धक्का लागून मृत्यू झाल्याची हृदयद्रावक घटना उल्हासनगरात घडली आहे. कॅम्प क्रमांक ३ मधील ओटी सेक्शन चौक परिसरात १८ सप्टेंबर रोजी रात्री घडलेल्या या दुर्दैवी घटनेमुळे संपूर्ण शहरात तीव्र संताप व्यक्त केला जात आहे. याप्रकरणी पोलिसांनी सीसीटीव्ही यंत्रणा बसवणाऱ्या संबंधित खासगी कंपनीच्या ठेकेदारावर निष्काळजीपणाचा गुन्हा दाखल केला आहे. करिश्मा माधवानी (वय २६) असे या अपघातात मृत्युमुखी पडलेल्या तरुणीचे नाव आहे.
मिळालेल्या माहितीनुसार, उल्हासनगरातील प्रसिद्ध झुलेलाल चालिया उत्सवात सहभागी होऊन करिश्मा माधवानी ही आपला भाऊ मोहित माधवानी याच्यासोबत १८ सप्टेंबर रोजी रात्री साडेअकरा वाजण्याच्या सुमारास घरी परतत होती. दोघे बहीण-भाऊ पावसात भिजलेल्या अवस्थेत त्यांच्या गणेश गंगा इमारतीजवळ पोहोचले. त्यावेळी मोहितने हातातील प्रसादाची पिशवी करिश्माकडे सोपवली आणि तो स्वतःची स्कूटी पार्क करण्यासाठी थांबला. करिश्मा घराच्या दिशेने चालत जात असताना इमारतीजवळच पोलिसांसाठी बसवण्यात आलेल्या सीसीटीव्हीच्या लोखंडी खांबाला तिचा नकळत स्पर्श झाला. मुसळधार पावसामुळे खांबामध्ये आधीच उच्च दाबाचा वीजप्रवाह उतरलेला असल्याने करिश्माला विजेचा जोरदार झटका बसला आणि ती क्षणात जमिनीवर कोसळली.
भाऊ गाडी पार्क करून वळताच करिश्मा बेशुद्ध अवस्थेत पडलेली दिसली, ज्यामुळे परिसरात मोठी धावपळ उडाली. या धक्कादायक घटनेनंतर मध्यवर्ती पोलिसांनी तातडीने तपासाची चक्रे फिरवली. संपूर्ण शहरात पोलिसांच्या निगराणीसाठी सीसीटीव्ही कॅमेरे बसवण्याचे काम ‘मॅट्रिक्स स्मार्ट टेक्नॉलॉजी प्रायव्हेट लिमिटेड’ या शासकीय ठेकेदार कंपनीकडे सोपवण्यात आले होते. या दुर्घटनेचे गांभीर्य लक्षात घेऊन पोलिसांनी ठेकेदार कंपनीविरुद्ध गुन्हा दाखल केला आहे. हा जीवघेणा प्रकार संबंधित ठेकेदाराच्या निष्काळजीपणामुळे घडला की महावितरण विभागाच्या हलगर्जीपणामुळे झाला, याचा पोलीस सखोल तांत्रिक तपास करत आहेत, अशी माहिती पोलीस परिमंडळ-४ उल्हासनगरचे पोलीस उपायुक्त सचिन गोरे यांनी दिली आहे. एका निष्पाप तरुणीचा सार्वजनिक उपकरणातील हलगर्जीपणामुळे जीव गेल्याने नागरिकांमधून महावितरण आणि प्रशासनाच्या कारभारावर जोरदार ताशेरे ओढले जात आहेत.
