दापोली: म्हशी चरायला घेऊन गेलेल्या एका गुराख्याचा माटवण परिसरातील पाणवठ्यात बुडून दुर्दैवी मृत्यू झाल्याची घटना घडली आहे. हरि विठ्ठल काते (मुळ रा. पालगड गवळवाडी, सध्या रा. माटवण, ता. दापोली) असे मयत गुराख्याचे नाव असून, याप्रकरणी दापोली पोलीस ठाण्यात अकस्मात मृत्यूची नोंद करण्यात आली आहे.
मिळालेल्या माहितीनुसार, हरि काते हे दरवर्षी जुलै ते डिसेंबर या कालावधीत माटवण येथे म्हशी पाळणे व चारण्याचे काम करत होते. त्यांच्या नित्यनेमानुसार ते दररोज सकाळी आठ वाजता म्हशी चरण्यासाठी नेत असत व दुपारी बाराच्या सुमारास परत आणत. त्यानंतर पुन्हा दुपारी साडेतीन वाजता म्हशी घेऊन जाऊन सायंकाळी सहा वाजेपर्यंत परत येत असत. नेहमीप्रमाणे ३१ ऑक्टोबर रोजी दुपारी साडेतीन वाजण्याच्या सुमारास ते म्हशी चरण्यासाठी माटवण रस्त्यालगत असलेल्या जंगलात घेऊन गेले होते. मात्र, सायंकाळी सहा वाजले तरी ते परत न आल्याने म्हशींच्या मालकांनी त्यांचा शोध घेण्यास सुरुवात केली.
शोध घेत असताना जंगलात म्हशी चरताना आढळून आल्या, परंतु गुराखी हरि काते यांचा कुठेही पत्ता लागला नाही. मोठ्याने हाका मारूनही त्यांचा प्रतिसाद न मिळाल्याने अखेर म्हशींना वाड्यात आणून बांधण्यात आले. त्यानंतर ते माटवण येथील आपल्या घरी गेले असतील या शक्यतेने कुटुंबीयांनी त्यांच्या घरी जाऊन चौकशी केली, मात्र ते तिथेही पोहोचले नव्हते. अखेर म्हशी पाणी पिण्यासाठी ज्या ठिकाणी जातात, त्या काटलीचा पऱ्या या पाणवठ्याच्या दिशेने शोधमोहीम सुरू करण्यात आली.
रात्री साडेनऊ वाजण्याच्या सुमारास काटलीचा पऱ्या येथील पाण्यात हरि काते हे उपड्या अवस्थेत निपचित पडलेले आढळून आले. त्यांना तातडीने बाहेर काढून उपचारासाठी दापोली येथील उपजिल्हा रुग्णालयात दाखल करण्यात आले. मात्र, रुग्णालयातील वैद्यकीय अधिकाऱ्यांनी तपासणीअंती त्यांना उपचारापूर्वीच मयत घोषित केले. या घटनेची माहिती मिळताच दापोली पोलीस ठाण्यात १ नोव्हेंबर रोजी पहाटेच्या सुमारास भारतीय नागरिक सुरक्षा संहिता (बीएनएसएस) कलम १९४ अन्वये अकस्मात मृत्यूचा गुन्हा नोंदवण्यात आला असून, पोलीस या घटनेचा पुढील तपास करत आहेत.
